меҳнатӣ, мақомоти давлатӣ оид ба ҳалли баҳсҳои меҳнатии коллективӣ вазифадоранд, ки барои ҳалли баҳси меҳнатии коллективӣ тамоми имкониятҳои пешбининамудаи қонунро истифода баранд.

Созиши тарафҳои баҳси коллективиро дар ҳар марҳилаи ҳалли он ба даст овардан мумкин аст. Созиши хаттӣ барои тарафҳои баҳси меҳнатии коллективӣ ҳатмӣ мебошад.

Мутобиқи моддаи 323 КМ ҶТ, дар сурати саркашӣ намудан аз иҷрои созиши дар ҷараёни мусолиҳа ҳосилшуда, кормандон метавонанд корпартой эълон кунанд.

17.3.2. Баррасии баҳсҳои меҳнатии коллективӣ бо иштироки миёнарав

Қоидаҳои умумии баррасии баҳси меҳнатии коллективӣ бо иштироки миёнарав, дар моддаи 320 КМ ҶТ муқаррар шудаанд. Тартиби баррасии баҳси мушаххас бо иштироки миёнарав, бо мувофиқаи тарафҳо муайян карда мешавад.

Тарафҳои баҳси меҳнатии коллективӣ вазифадоранд, на дертар аз рӯзи дигари кории пас аз рӯзи таҳияи протоколи ихтилофот, бо иштироки миёнарав гуфтушунид кунанд. Ин марҳила ихтиёрӣ аст. Агар тарафҳои баҳси меҳнатии коллективӣ дар бораи баррасии он бо иштироки миёнарав розӣ шаванд, созишномаи дахлдор баста мешавад, ки пас аз он тарафҳо вазифадоранд, ки на дертар аз ду рӯзи корӣ оид ба номзадии миёнарав мувофиқат кунанд. Миёнаравро тарафҳо мустақилона пайдо карда