БОБИ 4. МУНОСИБАТҲОИ ҲУҚУҚИИ МЕҲНАТӢ

4.1 Низоми муносибатҳои ҳуқуқӣ дар соҳаи меҳнат ва намудҳои онҳо

Муносибатҳои ҳуқуқии меҳнатӣ ҳангоми истифодаи меҳнати кироя, дар заминаи фаъолияти муштараки корманд ва корфармо ба вуҷуд меоянд. Асоси тавлиди муносибатҳои ҳуқуқии меҳнатӣ, яъне муносибатҳои меҳнатии бо ҳуқуқи меҳнат танзимшаванда, шартномаи меҳнатӣ мебошад, ки байни корманд ва корфармо баста мешавад.

Дар баробари муносибатҳои ҳуқуқии меҳнатӣ ҳангоми истифодаи меҳнати кироя, муносибатҳои ҳуқуқии дигар низ ба миён меоянд. Чунин муносибатҳои ҳуқуқии меҳнатӣ, ки онҳоро низ ҳуқуқи меҳнат танзим менамояд, дар шакли муносибатҳои ҳуқуқии дахлдор пайдо мешаванд, ки ба масъалаҳои меҳнат бевосита алоқаманд мебошанд.

Мавриди зикр аст, ки муносибатҳои ҳуқуқии меҳнатӣ аҳамияти аввалиндараҷа доранд ва ҳамаи дигар муносибатҳои ҳуқуқии ба онҳо алоқаманд барои рушд ва таҳкими муносибатҳои ҳуқуқии меҳнатӣ замина мегузоранд.

Одатан зери мафҳуми дигар муносибатҳои алоқаманд ё ба истилоҳ ба муносибатҳои меҳнатӣ робитадошта чунин муносибатҳои ҳуқуқие фаҳмида мешавад, ки ҳузури онҳо мавҷудияти муносибатҳои