ТАРОНАҲО

Чӣ сӯзе буда андар сози Аҳмад,
Ки дилро мекунад ҳамрози Аҳмад.
Фурӯ басту шикаст овозам, эй дил,
Ба гӯшам чун расид овози Аҳмад.

Аҷал санге ба ҷоми умри ӯ шуд,
Вале боло мақоми умри ӯ шуд.
Агар умри суруде буд ҳофиз,
Суруди ӯ давоми умри ӯ шуд.

Хаёлам аз навоҳояш пареш аст
Дилам аз нағмаҳояш реш-реш аст.
Гаҳе болида мехонад, ки нӯш аст
Гаҳе нолида мехонад, ки неш аст.

Бупечад савти ӯ дар маҳфили мо
Бишӯрад лаҳзае обу гили мо.
Агар овози ӯ хомӯш гардад,
Садо бидҳад сурудаш дар дили мо.