Забони модарӣ
Чӣ сон азиз аст, басо лазиз аст,
Забони модарӣ,
Зи шираи ҷон гирифта ҷавҳар,
Дурдонарез аст,
Аз теғ тез аст,
Забони бурро — забони модарӣ.
Дар арсаи кор
Ту ҳамсадоӣ, ҳам бебаҳоӣ,
Забони корӣ, ҷозиба дорӣ.
Ғайрату завқам
Ту кардӣ бисёр,
Зӯру тавоно забони модарӣ.
Дар шӯришу ҷанг
Забони фатҳӣ,
Дар ғазаб оӣ, басо шуҷоӣ,
Адӯ кунӣ қир бо найзаю тир.
Шуда ҳамоҳанг
Ханҷари бурро — забони модарӣ.
Чӣ сон азизӣ, басо лазизӣ,
Забони тоҷик,
Ширинтар аз ҷон, зи нукта борик.
Дурдонарезӣ,
Аз теғ тезӣ,
Ба ту шарафҳо, забони модарӣ!

Иброҳим Раҳматов

Нуктае, к-он ҷаст ногоҳ аз забон,
Ҳамчу тире дон, ки он ҷаст аз камон.
Во нагардад аз раҳ он тир, эй писар!
Банд бояд кард селеро зи сар.
Чун гузашт аз сар, ҷаҳонеро гирифт,
Гар ҷаҳон вайрон кунад, набвад шигифт.

Ҷалолуддини Румӣ