В-ар чӣ адаб дораду дониш падар,
Ҳосили мерос ба фарзанд не.

---

Чор чиз мар озодаро зи ғам бихарад,
Тани дурусту хӯи некӯ, номи некӯ, хирад,
Ҳар он ки эзидаш ин ҳар чор рӯзӣ кард,
Сазад, ки шод зияд ҷовидону ғам нахӯрад.

---

Ҳон Рӯдакӣ, аз қайди ғам озод бизӣ!
Бо хотири хурраму дили шод бизӣ!
Вайронии худ мангару ободии даҳр,
Вайронии даҳр бину обод бизӣ.

Дар панди Рӯдакӣ рашку ҳасад, сарватпарастию мағрурӣ сахт маҳкум шуда, одаму одамшиносӣ, қаноат, накӯкорӣ ва дӯстию рафоқат ҳамчун хислатҳои хуби инсонӣ тараннум ёфтааст:

Он киро донам, ки ӯям душман аст,
В-аз равони пок бадхоҳи ман аст.
Ҳам ба ҳар гаҳ дӯстии ӯямш ман,
Ҳам сухан бо оҳистагӣ гӯямш ман.

---

Бо дода қаноат куну бо дод бизӣ!
Дар банди такаллуф машав, озод бизӣ!
Дар беҳ зи худӣ назар макун, ғусса махӯр,
Дар кам зи худӣ назар куну шод бизӣ!

---

Замона панди озодавор дод маро,
Замонаро нигарӣ сар ба сар ҳама панд аст.
Ба рӯзи неки касон, гуфт, ғам махӯр зинҳор,
Басо касо, ки ба рӯзи ту орзӯманд аст.

---

Ба чашми дилат дид бояд ҷаҳон,
Ки чашми сари ту набинад ниҳон.