Бузургмеҳри Тоҷиддин

---

Бегоҳу пагоҳро бихоҳам бо ту,
Испеду сиёҳро бихоҳам бо ту.
Гар кори савоб бе ту кардам, тавба,
Такрори гуноҳро бихоҳам бо ту.

---

Дарё, ки ба ҷойи ман ҷавонӣ дорад,
Аз дафтари ман сурудхонӣ дорад.
Мағрурии кӯҳсорияш кам нашавад,
То бо кафи мавҷ зарфишонӣ дорад.

---

Аз шамс паём бар дили сард диҳам,
Навмедии ишқро фаровард диҳам.
Устод ба ман ҳарфи ниёгон омӯхт,
То ин ки ҷавоби номаи зард диҳам.

---

Дарёст равон, вале ба манзил нарасад,
Зеро ки даме ба қадри соҳил нарасад.
Эй дӯст, ниёзи ман ба дастони ту аст,
Хуршед ба гарм кардани дил нарасад!

---

Пурзӯр маро ба сину шинам гардон,
Лоиқ ба замону ҳам заминам гардон.
То шарм зи ному насаби худ накунам,
Бо меҳр бузургу тоҷи динам гардон!

---

Пайроҳаи рӯзгор ҳамвор нагашт,
Ҳамвор куҷо, ки ҳеҷ бехор нагашт.
Як умри дароз шиша холӣ кардем,
Паймонаи мо валек саршор нагашт...