Дили ойинабанд

ДУБАЙТИҲО

Маро то хонаи модар шитоб аст,
Ғамони беҳисобамро ҳисоб аст.
Ба пояш рӯзи сардамро расонам,
Ки ӯ дилсӯзтар аз офтоб аст.

---

Туро чун роз аз дил мебарорам,
Ба дунёи ҷудоӣ мегузорам.
Ҳисоби лаҳзаҳои мондаамро
Ба дасти соати дил месупорам.

---

Фалак фарқи гулу хоре нагӯяд,
Сабукбор асту аз боре нагӯяд.
Шавад ҳар лаҳза дигар чеҳраи ман,
Сабабро аксбардоре нагӯяд.

---

Дилатро тангии дунё мабодо,
Дар он ҷуз ишқи ман савдо мабодо.
Ҳама шабро саҳар бодо ба зудӣ,
Шаби мӯйи туро, асло, мабодо!

---

Ҳазорон ошиқи дигар бирӯяд,
Ҳазорон содиқи дигар бирӯяд.
Чу Турсунзода устоде агар ҳаст,
Ҳазорон Лоиқи дигар бирӯяд.
Бузургмеҳри Тоҷиддин

---

Само, чашмони бахтам кӯр будаст,
Замин, дарёи умрам шӯр будаст.
Ба гӯри танг бурдам хештанро,
Дили ӯ тангтар аз гӯр будаст.

---

Пас аз ӯ ёр дар дунё накобам,
Шабу рӯзон бикобам ҳам, наёбам.
Бароям дод даъватномаи тӯй,
Ҷавоби номаҳои беҷавобам.

---

Ба ҳукмам чархи гардун то саҳар буд,
Лаби ту бар лаби ман шеъри тар буд.
Ду дунё рафт аз ёдам ҳамон шаб,
Ки оғӯши ту дунёи дигар буд.

---

Агар имрӯз хандидем, беҷост,
Ки ташхиси дили мо кори болост.
Маҷӯ барномаи обу ҳаворо,
Ки ин борон давоми гиряи мост.

---

Бимон, Наврӯзи ман рӯйи ту бошад,
Нишони бахти ман бӯйи ту бошад.
Биафшон шеър аз мӯят, ки имшаб
Шаби эҷодии мӯйи ту бошад.

---

Туро бахти накӯ аз сар наояд,
Биёяд шому он ахтар наояд.
Ту дунёям будӣ, рафтам ман аз ту,
Зи дунё рафтае дигар наояд.