Дили ойинабанд

---

Ҷаҳон аз туст, дигар зиндагӣ кун,
Бимон, эй некахтар, зиндагӣ кун.
Туро модар чунин осон назодаст,
Ба ҳаққи ранҷи модар зиндагӣ кун!

---

Чу ойина зи ҳуснат қисса кардам,
Дилатро пок аз ҳар ғусса кардам.
Бигаштӣ об, зеро ман чу хуршед
Ҳама барфи вуҷудат бӯса кардам.

---

Пас аз ман, субҳ, ёди рӯйи ӯ кун,
Пас аз ман, шом, ёди мӯйи ӯ кун.
Пас аз ман кӯйи ӯро кас наёбад,
Пас аз ман, бод, ёди кӯйи ӯ кун.

---

На як Лайло, на як Маҷнун бигиряд,
Ҳамон абру ҳамин Ҷайҳун бигиряд.
Зи шодӣ ашк резад одамизод,
Мабодо, аз ғами дил хун бигиряд.

---

Саре хок аст аз шӯри ҳақиқат,
Диле тор аст аз нури ҳақиқат.
Ба чашми хеш дидам, баста буданд
Ҳазорон даст аз зӯри ҳақиқат.

---

Пас аз ту бод мекӯбад дарамро,
Зи худ озод мекӯбад дарамро.
Ту, ки хомӯш рафтӣ аз дари ман,
Ба сад фарёд мекӯбад дарамро.