Бузургмеҳри Тоҷиддин

---

Замоне ки адӯ зар ҷустуҷӯ дошт,
Бад-ин раҳ Қофро дар рӯ ба рӯ дошт,
Зи шаҳди зиндагонии дурӯза
Лаби ман бо лаби ту гуфтугӯ дошт.

---

Лаби чун ғунчаатро нӯши дигар,
Дили девонаатро ҷӯши дигар.
Раҳи умри туро дидам, ки будаст
Зи як оғӯш то оғӯши дигар.

---

Бикун бовар, ки рафтам аз ҷаҳонат,
Ба ҳам будем аз қисмат амонат.
Баҳори ман набудӣ ҳеҷ фасле,
Набудам низ фасле ман хазонат!

---

Шабонгаҳро маҳе бояд, азизам,
Маро то ту раҳе бояд, азизам.
Гадои раҳгузар гуфтӣ маро, лек
Гадоро ҳам шаҳе бояд, азизам.

---

Сари мову сарои ту, азизам,
Хати мову хатои ту, азизам.
Ту нуре аз Аҳурою ба ҳам бод
Шаби мову ҷилои ту, азизам.

---

Бихоҳам дар ҳавои ту бимирам,
Чу ахтар дар самои ту бимирам.
Барои дигарон гар зинда будам,
Иҷозат деҳ, барои ту бимирам.
Дили ойинабанд

---

Сари шӯридаро ҳастӣ ту сарвар,
Раҳи печидаро ҳастӣ ту раҳбар.
Ба поси рӯзу шабҳои пур аз нур
Манам дар чашмҳои ту чу гавҳар.

---

Зи чашмам рафтаӣ монанди дирӯз,
Намеоӣ вале монанди имрӯз.
Маро бе ту набошад ҳеҷ фардо,
Биё аз дурҳо бо роҳи Наврӯз.

---

Наорӣ ёд Синои Худоро,
Наарзӣ гар ту дарди бедаворо.
Шакуриро набишносӣ, чӣ парвост,
Ту эй нашнохта Садри Зиёро!

---

Зи шодӣ то ба ғам дигар гурезам,
Саросар хокро бо каф бибезам.
Зи дасти марги ёри ҷонии хеш
Ба пойи зиндагонӣ ашк резам.

---

Писанди ту шавад шеъре, ки гӯям,
Гули хушрӯю хушбӯӣ, ки бӯям.
Наёбам аз ҷаҳону ёбам аз ту,
Аё дилбар, ҳар он чизе, ки ҷӯям.

---

Биё, сабзинаи деҳи Қаротоғ,
Туро ман интизорам боз дар боғ.
Бад-он покии домону дили хеш
Намон, зинҳор, дар рӯйи дилам доғ.