---

Дил дар он ёри диловез овехт,
Фитна ин аст, ки он ёр ангехт!

Дилу дину майу аҳду қувват
Рахтбарсар ба яке пой гурехт!

Дили ман боз намеёбад сабр,
Ҳама офоқ ба ғирболи ту бехт!

В-ар намеёбад, он силсиламӯй
Кори ҷонам ба яке мӯй овехт.

Дил ба сӯи дил рафтам ба дараш,
Чашмам аз ашк басе чашм овехт.

Ёри гулрух чу маро бор надод,
Гули умрам ҳама аз пой бирехт!

---

Эй ба дида дареғ хоки дарат,
Ҳама савганди ман ба ҷону сарат!

Гӯшро миннат аст бар ҳама тан
Аз пайи он ҳадиси чун шакарат.

Ашк чун симу рух чу зар кардам
Аз барои нисори раҳгузарат.

Мояи кимиёст хоки дарат,
Кай дарояд ба чашм симу зарат!

Дили бераҳми ту раҳим шавад,
Гар зи ҳоли дилам шавад хабарат.

---

Рухат маҳро руху фарзин ниҳодаст,
Лабат беҷодаро сад зарба додаст.

Чу рӯят кай бувад он маҳ, ки ҳар маҳ
Се рӯз аз маркаби хубӣ пиёда-ст.