шуд; ба наздикӣ аз ин ҷо галаи аспони ваҳшӣ гузашта рафта, заминро канда буданд ва бинобар ҳамчун изи муайянеро кофта ёфтан амри маҳол буд.

Онҳо ба самти савораи бесар рафтагӣ метавонистанд роҳро давом диҳанд. Офтоб ва бевақттар ситораи аср роҳнамояшон мешуд. Вале онҳо савораи бесарро диданӣ буданд ва ним соат вақте, ки дар ин равшании хомӯш гашта истода ба ҷустуҷӯ гузашт, барабас рафт — из дар дашти табошира ғоиб гардид.

Чун офтоб ғуруб кард, Спенглер гуфт, ки дигар ҳеҷ илоҷ кардан мумкин нест.

Ба ҷуз ба беша баргаштан ва дар канори он урдугоҳи муваққатӣ гирифтан дигар чора набуд.

Қарор дода шуд, ки баробари дамидани сапеда ба ҷустуҷӯ шурӯъ кунанд.

Вале ин ба онҳо муяссар нагардид — алалхусус дар вақти таъиншуда. Воқеаи ногаҳоние ба ин халал расонд.

Онҳо ҳанӯз ба задани хайма фурсат наёфта қосид ба номи майор номаи фаврие овард. Мактуб аз фармондеҳи округ аз Сан-Антонио-де-Бихор аз штаб оварда шуда буд. Онро ба қалъа фиристода, баъд ба ин ҷо оварда буданд.

Майор фармон дод, ки аспҳо зин карда шаванд ва арақи аспони шалпар хушк нагашта, драгунҳо боз ба онҳо савор шуданд.

Дар мактуб гуфта мешуд, ки дар чету атрофҳои Сан-Антонио, тахмин панҷоҳ миль шарқтари Леона команчиҳо пайдо шудаанд.

Акнун ин гапҳои беҳуда набуданд. Тоҳтутоэ якҷоя бо он сӯхтор ва куштор шурӯъ гардида буд.

Майор супориш гирифта буд, ки фурсатро аз даст надода, отряд ҷамъ карда, ба Сан-Антонио фиристад. Сабаби саросемавор ба роҳ даромадани драгунҳо ҳамин буд.

Албатта, ҷустуҷӯи пайро плантаторҳо давом дода метавонистанд, вале дӯстӣ ва ҳатто меҳру муҳаббати падарона дар назди зарурат сар хам мекунанд: онҳо фақат аслиҳа гирифта ба роҳ даромада буданд ва акнун гуруснагӣ онҳоро ба хона меронд.

Ҳеҷ кас аз кофтуков рӯ гардонданӣ набуд. Ҳамин ки иштирокчиён аспонро иваз карда, хӯрокворӣ захира менамуданд, мебоист кофтуков аз нав шурӯъ мешуд ва чӣ тавре ки ҳама гуфтанд, «то ёфт шудани ҷавони бечора» давом мекунад.

Якчанд кас ҳамроҳи Спенглер монданд, то изи аспи зоти америкоиро, ки ба фикри пайгир мебоист ба қафо ба Леона мебурд,