Сангҳоятро ба хунам ранг хоҳам кард,
Ҷони худро дар сари ҳар санг хоҳам кард,
Ҳарчи дорам дар сари ин нанг хоҳам кард,
Лек хоки пойи поконро нахоҳам дод,
Тоҷикистонро нахоҳам дод!

ТОҶИК

Зебо ба руху ба чашму қошӣ, тоҷик!
Покизаниҳоду нурпошӣ, тоҷик!

Бо нони ҳалолу нийяту ҷони пок
Умре пайи ризқ дар талошӣ, тоҷик!

То чоши фалакро ба каф орӣ, умре
Дар рӯи замин ту чошу пошӣ, тоҷик!

Бо ин дили нарму сари сахтат, эй кош,
Дар рӯи замин ту зинда бошӣ, тоҷик!

Бигзор равад «Оши худоӣ» аз байн,
Ту зор набудаӣ ба оше, тоҷик!

Мақсуд зи ош ваҳдату сулҳ бувад,
Варна ту на зори ошу пошӣ, тоҷик!

Ҳар кас ки заиф гашт, зери по монд,
Гардан набикаш зи ҳақталошӣ, тоҷик!

Ин давлати нав, ки нав расидӣ бар он,
Эй кош, зи ҳам дигар напошӣ, тоҷик!

Дар рӯи ҷаҳон ба Рӯдакиву Саъдӣ
Фазлу хираду адаб бичошӣ, тоҷик!

Бо дунбураву нақора, рақсу бозӣ
Ғамро зи вуҷуди худ тарошӣ, тоҷик!

Умрест маошаш аз маонӣ буда,
Ғам кай бихӯрад зи каммаошӣ тоҷик!