ДАР РӮЙИ ГУЛЕ
Дар рӯйи гуле рӯйи сафоро дидам,
Дар бӯйи гуле бӯйи вафоро дидам.
Дар ҳар гули покиза шукуфони баҳор
Эҳсони шукуфтаи Худоро дидам.

ҲАЙҲОТ
Бикшода дари худем акнун, ҳайҳот,
Савдои сари худем акнун, ҳайҳот.
Моро, ки ҳамеша кард душман тороҷ,
Тороҷгари худем акнун, ҳайҳот.

ЗАМИНҲОИ ДУШАНБЕ
Заминҳои Душанбе шуд ба коми ин, ба коми он,
Ба мо бепул расид аз ин замин гаҳ боду гаҳ борон.
Хазонашро чанораш чун навозиш бар сарам афшонд,
Ба ман аз хоки зархези Ватан ин хокбориш монд.

ЭЙ ҒАРРАИ ХУД
Эй ғарраи худ, ту аз куҷо медонӣ,
Тақдир чиҳо навишта дар пешонӣ?
Дидем, гадо шоҳ шуду шоҳ гадо,
Бо сарзадагӣ бимурд дар сарсонӣ…

БО ИШҚ
Ҳоҳӣ, ки бимонӣ ба худат, мон бо ишқ,
Оинаи қудсиён бувад ҷон бо ишқ.
Бунёди ману ту кард Яздон бо ишқ,
Дар рафтани худ калом гардон бо ишқ.

ЯК ОҲ
Ман чӣ гӯям, чун ҳамин оғоз
Оқибат анҷоми ин роҳ аст,
Умри ман чун ғусса беохир,
Умри ман чун бӯса як оҳ аст.