Пайки умедворон, уммеди дӯстдорон,
Некӣ ба душмани ҷон, Наврӯзи Тоҷикистон.

Андар само ба ҷавлон рӯҳи бузургворон,
Шогунаи азизон, Наврӯзи Тоҷикистон!

Имдоди додҷӯён, иршоди шодрӯён,
Озодагии имон, Наврӯзи Тоҷикистон!

Шаббодаи сафоро, лутфи дари Худоро
Бар дӯши мо биафшон, Наврӯзи Тоҷикистон!

Як сӯй гулфишонист, як сӯй дилфишонист,
Як сӯй бӯсаборон, Наврӯзи Тоҷикистон!

Пар боз кун чу Симурғ, эй парчами ниёкон,
Ҷашни замину кайҳон, Наврӯзи Тоҷикистон!

СИМОИ ТОҶИКОН

Наврӯзи файзафшон симои тоҷикон аст,
Рӯи сафову некӣ дар ройи тоҷикон аст.

Наврӯз бо ҳазорон оинаҳои покӣ
Имрӯзи тоҷикон аст, фардои тоҷикон аст.

То бар фалак расонад суру суруди худро,
Овои ғижжаку тор овои тоҷикон аст.

Азбаски дар вуҷудаш чун ҷон сухан даромад,
Сарводаҳои сурӣ сарвои тоҷикон аст.

Бунёди нек то ҳаст ин халқ пойдор аст,
Зеро манори некӣ минои тоҷикон аст.

Ин ҷодаҳои гулгун, ин кӯҳи сар ба гардун,
Ин марғзори серун ҷопои тоҷикон аст.

Сад пеша реша дорад дар ҷону пайкари ӯ,
Эъҷози офариниш эҳдои тоҷикон аст.