Ҳар куҷо барги хазон дар кафи шахшӯли чанор,
1 Дар назар чумчаи лабрез намояд аз тарф.

Жола-жола бичакад барги гули ишқи сапед,
Дили ман пур шавад аз нусрати ӯ зарф ба зарф.

Ба зарофат чи зариф аст зимистон, эй дӯст,
2 Замҳарирест, ки аз мову ту мехоҳад зарф.

Ин сапедӣ ҳама обистани ишқ асту навид,
Ҳар куҷо буд сиёҳӣ, ҳама ғӯтида ба жарф.
15-17.01.2012

БЕТАРАФӢ
Рост умрест, ки мо бетарафем,
Ту бигӯ, аз чӣ, чаро бетарафем?!

Бетараф аз чӣ замин мерӯяд?
Аз чӣ мо мисли ҳаво бетарафем?!

Бингар, ин бетарафӣ – бешарафист,
Чанд дар пеши риё бетарафем?!

Нанг доем?! Чаро хомӯшем?!
Рӯи мо хӯрд рибо, бетарафем.

Бетараф будани мо марги касест,
Адл дар коми бало, бетарафем.

Нафси бад хӯрд сари қонунро,
Сарамон шуд сари по, бетарафем.

Оқибат бетарафонро ҳам бурд
Фанди ин сели фано, бетарафем.

3
Ватан аз дасти бадон бадхим аст,
Чӣ шигифто, чӣ бадо, бетарафем!!
19.02.2012

1
Тарф – ҷурғот.
2
Зарф – тоқат.
Бадхим – бемории мушкилшифо.