3.2. МАФҲУМИ «ДЕҲҚОН» АЗ НАЗАРИ Б.ҒАФУРОВ

Академик Е. М. Жуков дар барқияи табрикотии худ ба муносибати 70-солагии академик Б. Ғ. Ғафуров навишта буд, ки «… мехостам боз як бори дигар саҳми бузурги ўро дар инкишофи илми таърихшиносии шўравӣ хотирнишон карда, изҳори боварӣ намоям, ки анъанаҳои бунёдгузоштаи Б. Ғ. Ғафуров барои донишмандони Тоҷикистони шўравӣ намунаи ибратбахш буда, дар асарҳои навини ховаршиносони шўравӣ зиндагии тоза хоҳад ёфт» [1].
Саҳми Б. Ғ. Ғафуров дар инкишофи таърихшиносиии шўравӣ, ба вижа таърихшиносии тоҷик бузургу қиёснашаванда мебошад. Мақолаву рисолаҳои бунёдии олим, ки оид ба тадқиқи паҳлуҳои гуногуни таърихи халқи тоҷик бахшида шудааст, аз ҷиддияти масъалагузорӣ, фарохии пажуҳишҳои алома равшан шаҳодат медиҳанд.
Ў ҳангоми пажуҳиши ин ё он масъала ҳадди муайяну заруриро нигоҳ медошт. «Ҳадде асту аз он гузаштани таърихшинос мумкин нест, - навишта буд академик Б. Ғ.
Ғафуров, - зеро агар вай аз ин ҳад гузарад, на ин ки таърихшинос, балки қиссапардоз мешавад» [2].
Чунин андешаву мулоҳизоти Б. Ғафуров имрўз ва оянда низ барои пажуҳандагон дарсу мактаб хоҳад буд. Дар мақолаву асарҳои Б. Ғ. Ғафуров ҳар як масъалаю ҳаводиси таърихӣ дар асоси далелҳои мушаххас ва воқеъбинона дар чаҳорчўбаи принсипи таърихият таҳлил шудааст. Мо, имрўз дар муқоиса бо қиссапардозии олимони хасакии дохилию хориҷӣ, васоити ахбори умум, китобҳои алоҳида, шабакаи Интернет бори дигар ба дақиқию воқеъиятнигории Б.Ғ.Ғафуров бовар ҳосил мекунем. Ин воқеиятро дар омўзиш ва таҳлили мафҳуми истилоҳи «деҳқон» ва таҳаввулоти он метавон бараъло мушоҳида намуд.