САБРИН

Қанду асалак Сабрин,
Шӯру мағалак Сабрин.

Пар-пар зада мерақсад,
Боли шапалак Сабрин.

Аз раддаи дандонаш,
Хушрӯ гули домонаш.

Аз ҳалқаи гӯши ӯ,
Аз оташи марҷонаш.

Аз хандаи дилҷӯяш,
Ду лолаяки рӯяш.

Аз атри хуши кокул,
Ду чашмаки олуяш.

Шармида баҳор ояд,
Нозида баҳор ояд.

Дар кӯчаву дар хона
Сад гул ба нисор ояд.

Бо мост, баҳор ояд,
Ҳарҷост, баҳор ояд!

Он ҷо, ки қадам монад,
Аз рост, баҳор ояд!