---

Кӯдаке мегашт бо қуттии худ
Дар хиёбони лаби баҳри кабуд.

Метавонистӣ, ки дар чашмони ӯ
Пай барӣ аз мақсади пинҳони ӯ.

Медавид он ҳар тараф бо ҷустуҷӯ,
Сӯи ҳар як раҳгузар оварда рӯ.

Огаҳӣ медод симои писар,
К-омадаст ин ҷо вай аз мулки дигар,

Ӯ нарезондаст хуни нофи худ
Дар ҳамин шаҳри лаби баҳри кабуд.

Гашт маълумам, ки афғонбаччаест,
Содаю гумроҳу нодонбаччаест.

Гашт маълумам, ки меҳмон омадаст,
Меҳмон аз мулки афғон омадаст.

Гуфтам: «Эй сайёҳи ҳинди кобулӣ,
Кӯдаки хурдию дар ҳукми гулӣ.

Ҷисми хурдатро ба пушти Ҳиндукуш
Кӣ ҳаво дод, аз чӣ мегардӣ ҳамӯш?

Ё туро бахти сиёҳат рондааст?
Боди афғонӣ магар паррондааст?