САНГИ САБУК

Насим азоби рӯҳӣ мекашид, ки чанд гоҳи ахир муомилаи ҳамболини басо шармгину дидадаро ва зеби хонааш бо ӯ — шавҳараш, ки ёздаҳ сол ҳаммаслаку ҳамнафас мегашт, якбора мисли ҳавои баҳорӣ тағйир ёфтааст. Ҳарчанд сабаби падидаи номатлубро меҷӯяд, ҳайҳот, дар зеҳнаш ба аслӣ пешин муаммо мемонад. Дар мактаб гоҳи баёни мавзӯи нав, дар кӯча ҳини раҳравӣ одамон аз рӯяш гӯё чашм намеканданд. Зӯр буд, азоби мардак. Имрӯз раҳгузор дар саҳни бино бо Намози дойрачӣ вархӯрд. «Муборак шавад, оҷаи бачаҳо мошинсавор шудааст-а?» — заҳри забон зад миёни ҳамсояҳо ӯро. Мошинсаворӣ айб не, вале оҳанги духӯраи гуфтор ба ҷисмаш оташ зад. Дар хаёлаш осмон ба сараш нагун афтод. Хост ба даҳони бефаровези ӯ тӯйгард мушти обдор фурорад, боз аз обрӯяш андешид. Чаро вазъи оилавиаш халал ёфт? Ё, ношукрие аз дастонаш бигзаштаву бехабар аст. Куҷо шуд афсонаи ишқи пок ва кӣ дар боғи умрашон тухми ҷудоӣ мекорад? Бемеҳрии Сокина аз куҷо манша гирифтааст? Ӯро кай, ҳамраҳи кӣ дида бошад Намоз? Ин суолҳо раҳравон ӯро азият медод.

Имшаб барои фиреби вақт чанд саҳифа китоб хонд, қайдҳо нигошт. Чӣ хонду чӣ навишт, ба ёдаш намонд. Кӯдаконаш масти хоб. Чӣ шуғле дарёбад, ки дар муқобили афкори ботил муқовимат бикунад? Банохост духтарчааш «о-об!» — гӯён бедор шуд. Насим дарҳол об оварду нӯшондаш, ба болояш кӯрпа кашид, чароғро кушт ва рӯ-рӯи хона қадам зад. Аз саҳни тиреза ба кӯча нигарист. Шаҳр сокиту ором. Ширмаҳтоб. Ситораҳо ба моҳи шаби чаҳордаҳ ҳусни афзуда, шабонгаҳ рӯзи сафед метобид. Мардаки ошуфта пойбанди савдои умр ин манзараи муҷаллоро эҳсос намекард. Ҳар шаб то ҳамсараш аз басти шабонаи шифогоҳ бознамегашт, ба ҷойгаҳ дароз намекашид, яке гашнабаш мебараду ҳамсараш меояд. Пушти дар интизор азоб мекашад ва худаш низ аз хоб нофор мешавад.

Насим аз паси шишаҳои муҷалло мувоҷҷеҳи рухдоди берун буд. Мошини сабукрави ширҷойранг тайи чароғи симчӯб истод. Пеши дидагони мардак мавҷак зад. Аз дари пеш занаш фуромаду андактар ба даруни кабина хам шуда, аз миён поёнаш дар берун монд. Чиге гуфтанд, ки Сокина даст афшонд ва сумкачаашро ҷунбон-ҷунбон