• Нафаҳмидӣ ба куҷо?
• Ба ягон табобатгоҳ. Марҷонаро, хонаро нағз нигоҳубин бинамо...
• Беҳбудӣ ҳаст, охир?
• Маълум не. Дигар наё!
  Ва Насим бо сари пурсавдо ба хона баргашт.

Муаллим як моҳи бутун дар нигоҳубини кӯдакҳову хонаву дар азоби алим кашид. Кампири ҳамсоя ба ҷонаш даромад. Ҳолати ба мактаб рафтани Насим сариштани кӯдакҳо бар дӯши ӯ буд. Зулҳумор ба хоҳиши муаллим пардохт, ки чӣ хел шавҳар аст, ба куҷо табобатравии занашро намедонад. Чилави вайро сар дод, холаш ҳамин. Овози хаткашони пушти дарвоза намебуд, кампир алфози бадоҳанге мегуфт.

• Ин хати кӣ?
• Аз худи Кафказ омадааст! Бигиру ба вазифаи баландтаре рафтӣ, моро фаромӯш накун, - хандида номаро дароз кард марди ҳаракӣ.

Насим ҳайратзада дар ҷояш мекӯб шуд. Тамоман аҷоибаш намуд. Дар он силсилакӯҳҳои дур на ёре дораду на ёварс. Пас, ин қадрдони бомуҳаббат кияст ба унвони ӯ нома бинавишта? Андаруни лифофа ким-чӣ хел расм ҳам дорад. Дар дунё чӣ бисёр, ҳамном.

Ва муаллим бо ҳаяҷони ботинӣ номаро кушоду ҳуш аз сараш парид. Замин дар нигоҳаш ларзид, пойҳош карахт монда, тук-туки дилашро мешунид. Акси Сокинаи нимбараҳнаро медид, ки лаби баҳри кабуд бо як бузбалаи хузарби ришу мӯйлабаш расида барбабару хандоирӯ истодаанд. Оддӣ набуд ин расм, ёдоварии барои Насим! Нома чор ҷумла дошту тамом: «Салом, азизакам! Табобат олӣ мегузарад. Бибин, мо чӣ тавр истироҳат дорем. Сокинай ту».

Аз шаб инҷониб дар таб месӯзад, Марҷона. Ҳар замон меверичиду ранг мебохт. Сари болини вай модараш не, пиразани Зулҳумор ашк мерехт, ашки сӯзон. Байни қафаси синаи кӯдак омос дамида буд. «Ғамбодаи ҳақиқӣ...» - оҳи вазнин кашид момои Зулҳумор. Ва лукида-лукида хеста рафту аз сари мелоки сутуни долони хонааш дар шишаҷае рӯған овард. Кампир бо хушгӯй Марҷонаро ором кунонда, шиками ӯро нарм-нармак молид. Як андоза рӯғанро болои қафаси синаи вай чакконида, бо пахтае молида-молида бибаст. Дар бадали як ҳафта Марҷона ба по хест. Аз духтарак дида падар афзунтар ғаму дард мекашид.