МАҚБАРАИ ИСМОИЛИ СОМОНИ

Мақбараест, ки ба шарафи асосгузори давлати Сомониён – Исмоили Сомонӣ дар Бухоро бунёд гардидааст. Мақбара мураббаъшакл буда (андозааш 10,80х10,70), бо гунбази муҳташам пӯшонда шудааст. Кунҷҳои онро чор гулдаста (бурҷ) оро медиҳанд. Ҷиҳати фарқкунандаи мақбара аз чор тараф дари даромад доштанаш ва усули хиштчинии рӯйи бино аст. Ҳуҷраи начандон бузурги гӯрхона дар қисми шарқии зиёратхона воқеъ аст. Дар асри XIX дар пеши намои мақбара айвони васеъ сохтанд, ки дорои чаҳор шоҳсутун ва сақфи кандакорӣ мебошад. То замони мо беосеб расидани мақбара нишони ҳунари волои меъморон аст.