ДАРДИ ДИЛ

Диле дорам, вале дилбар надорам,
Саре дорам, вале сарвар надорам.
Ғаме дорам ниҳон дар синаи худ,
Вале ғамхору ғампарвар надорам.

Маро дардест, ҳамдардам куҷост?
Маро сӯзест, дилсардам куҷост?
Ҷавониям хазон мегардад охир,
Баҳори ман, ҷавонмардам куҷост?

Чаро беҳуда аз дунё бинолам?
Чу гул аз ҳусни худ бояд биболам.
Кушоям бо ҳавас девони Ҳофиз,
Барояд нек аз он, эй кош, фолам!

Ба ханҷар синаамро чок созед,
Ғамамро аз дили ман пок созед.
Бубахшоед ишқамро пару бол,
Маро як кафтари афлок созед.