---

Метавон андар диле ҷо кард чандин орзу,
Тор бисёр аст дарзирову сӯзан як бувад.

---

Ҳаст андар вожаи «бастан» кушоданҳо гираҳ,
Мешавад бикшода кори халқ аз оббандҳо.

---

Вақти пирӣ одам аз ҷурму хато бошад барӣ,
Оби дарё пок мегардад ба ҳангоми хазон.

---

Даргузар аз он ки ӯ наншаст дар мавқеи худ,
Тухм ҷогардон шавад, аз ӯ умеди чӯҷа нест.

---

Гарчи бар нахли умеди ман табарҳо мезананд,
Шохаҳои орзуям бештар оранд бор.

---

Вергулзулфи ту моро медиҳад ҳар дам фиреб,
Нуқтаи коми дили ман нест дар сатри қадат.

---

Рафта-рафта рӯзгори рафта ширин мешавад,
ИДМ хуб аст, аммо шӯравиям орзуст.

---

Баччагӣ бар ёдам ояд, к-аз раҳи завқу ҳавас,
Ризқ чун тӯб аст гӯё, медавам аз пушти он.

---

Хирмани мақсуд сӯзад з-оташи барқи талаб,
Шамъ аз теғи забонаш мекунад худро ҳалок.

---

Нестам осуда зери сояи шахси дигар,
Ман шабеҳи нахл худро соябонӣ мекунам.

---

Ҳамраҳи равшандилон будан саодат ҳасту бас,
Дуд аз оташ ҷудо гардад, парешон мешавад.

---

Меҳрубониҳои ноҷо гаҳ барад бар доми марг,
Шабнам аз як бӯсаи хуршед нобуд мешавад.