Ҳурмати борон

Ба ҳурмати қудуми обияш
Гиёҳу нахлҳо ба по шавад.

Пайрави баҳор

Шукуфтанист,
Аз яхча гул дорад.
Дай пайрави баҳор аст.

Табдил

Нарм будам мисли борон,
Аз ҳавои сарди ишқат
Жола гаштам.

Санговдавак

Азбаски будаст вазни шеърат сангин,
Санговдавак туро тахаллус карданд.

Гирдоб

Шеъри дарё то шавад мавзун,
Меравад дар худ фурӯ гирдоб.

Вақт

Рафт агар, рафт,
Барнамегардад.
Вақт мард аст.

Баҳор

Нест гарчи фасли Наврӯз,
Дар дили ман ҷунбиши шавқи баҳорон аст.
Чашмҳои сурхи бехобам
Лолаҳои арғувон аст.

Шоми зангӣ

Шоми зангиям,
Ахтаронам ҳаст дандонҳои ман.

Зинароҳ

Кӯҳзодам,
Зинароҳи кӯҳсорон
Зинароҳи қуллаи шеъри ман аст.

Сардорзу

Сард аст ҳавои орзуям,
Барфи сари ман намешавад об.

Ошиқ

Нест ошиқ ҳеҷ кас монанди борон бар замин,
К-аз барои бӯсае
Хешро меафканад аз осмон.

Дарё

Бувад ду соҳили дарё
Ду мисраъ,
Мисраи воло.
Шикасти мавҷҳо рукнанд,
Ҳар рукнаш тару шево.