На танҳо ба ханда,
Ба гиряи озод низ
Ҳуқуқи озод доранд.
Гўё табиати бузурганд.

---

Жандабўсии мазори душманон,
Жандапўше кард ҷонро дар бадан.
То биёбиву бибўсӣ гўри дил
Хорзори синаро оташ бизан.

---

Иқрор низ мардӣ металабад,
На камтар аз синасипарсозӣ барои Ватан.

---

Зиндаҳо хомўш бо ҳам рў ба рў,
Мурдаҳо ғавғоии тозон ба кў.

---

Тифли ҳарфи дил баромад боми лаб,
Лағз хўрду мурд дар тобути гўш.

---

Бесадо пои нигаҳ рў сўи зебоӣ равон,
Пои зебоӣ чунин то синаи мо шуд давон.

---

Ҷўши ишқам дар забону ҷўши шаҳват дар бадан,
Оламе ҷўшад ду оташ.
Бўстони зиндагонӣ
Об аз оташ мехўрад.

---

Як ҷомиа менолад аз бори дурўғ, аммо
Як дўш намеёбӣ боре кашад аз як рост.

---

Чун чашмаки дар дусўя бинад дили ман,
Як олами худ дурўя бинад дили ман.

---

Лаззату тарс умри чидаи зан,
Шаҳвату тарс умри дидаи мард.

---

Нони хушке аз дари хуршеду маҳ хоҳад,
Зиндагӣ дарвеши раҳгумкардаро монад.

---

Аз ишқ водамидӣ, чун нур ворасидӣ,
Якҷо ниҳону пайдо, якрў нави кўҳансўз.

---

Дар чашми ишқ дида ў дини зиндагонӣ,
Ҳаргиз надида чашме дине бад-ин фатонӣ.

---

Санги осиёи рашк бар одамӣ давон аст,
Магар ин ки орд созад дили гандумии одам.

---

Ину онро бишнавӣ ранге садо,
Чун садо яклухт ёбӣ гум садо.

---

Ҷанги сарди хона аз сардии зан,
Ҷанги гарми хона аз гармии мард.

---

Муфтхору коҳили рўйи замин,
Зодаи некии заҳматкаш бубин.