II

20 июли соли 1942 фашистони истилогар ба шаҳри Кадиевкаи вилояти Ворошиловград даромаданд. Як моҳ пеш аз ин бо сардории Г. Ф. Кононенко отряди партизанӣ ташкил шуда буд, ки ба он асосан коммунистон-у аъзоёни комсомол дохил буданд. Штаби партизанӣ дар бешазори гирду атрофи Кадиевка қарор гирифта буд. Партизанҳо бо супориши кумитаи шаҳрии партия ба қадри имкон дар мавқеи худ аслиҳаю хӯрокворӣ захира карда, аз рӯзҳои аввали истилои шаҳр ба амалиёт шурӯъ намуданд. Рӯзе набуд, ки фашистон аз дасти партизанҳо зарар набинанд. Партизанҳо кӯпрукҳоро метарконданд, хатти телефонҳоро мебуриданд, роҳҳои оҳанро вайрон ва ба гарнизонҳои душман ҳуҷум карда, фашистонро ба воҳима меандохтанд.

Фармондеҳони фашистон барои маҳв кардани отряди партизанӣ борҳо ба беша дастаҳои яккачин фиристода бошад ҳам, ба мақсадаш расида натавонист. Отряд якзайл қароргоҳи худро иваз мекард ва дар мавридҳои ба беша даромадани фашистон муқобилият нишон медод, бештар ногаҳон аз гӯша ҳуҷум карда ғанимат мегирифту талафот намедод. Боре ба отряд тақрибан ҳашт нафар асирони ҳарбии шӯравӣ, ки аз лагери асирони шаҳри Кадиевка гурехта буданд, ҳамроҳ шуданд. Шумораи аъзоёни отряди партизанӣ ба 63 нафар расид. Бисёр деҳаю шаҳракҳо ба ихтиёри партизанҳо гузашт. Акнун партизанҳо ба қисмҳои асосии фашистон, ки дар марказҳои ноҳия ва шаҳрҳо воқеъ буданд, ҳуҷум мекарданд.

Шаҳрҷаи партизанӣ дар ҷӯшу хурӯш буд. Андрейкаро рост ба штаб бурданд. Бо ӯ худи командири отряд Кононенко суҳбат кард ва пас аз фаҳмидани саргузашти ӯ ваъда дод, ки барои ҷустуҷӯи падараш чора меандешад.