Магар омаданаш ин сӯ, дар ҳақиқат, аз рӯи ақл набуда ва акнун ин ҷо нобуд мешавад ва ё тӯъмаи гургу хирсу паланг мегардад ва ё аз ҳама хатарбораш он, ки Умари Дузду одамонаш варо аз миёни ин кӯҳпораҳо дарёфта, ба балоҳое печонида метавонанд...

Ва ана оне, ки рӯи санги чӯр нишастааст, яке аз одамони Умари Дузд бошад, ки «интизори» Мирзо истода, то даст гирад ва ҷониби саркардаи худ барад? Ё магар худи ин Умари Дузд набошад?

Мирзои кӯчак ларзида буд ва истода буд ва дигар пеш рафта наметавонист.

Каси нишаста солхӯрдаи мӯйсафед метофт ва асо дошт. Ва ӯ дар ҳолати нишасташ ҳам ба асо такя мезад.

Магар дар дастаи Умари Дузд ҳам мӯйсафедони асобадаст бошанд ва аз пайи амалиётҳои махсус сафарбар шудаанд?

Аммо ин нафар ҳамоне буд, ки Мирзо мешинохт. Яқинтараш вай буд Асомиддин, яъне падари Камолиддини шаҳидшуда, ки рӯи санг нишаста буд.

Дар ин ҷо чӣ мекунад Асомиддин ва барои чӣ ин ҷо омада? Ва ӯ ба дастаи Умари Дузд чӣ дахл дорад?

• Ман ҳам натавонистам хона нишаста бошам, - изҳори дошта буд Асомиддин канда-канда. - Натавонистам дар хона нишаста бошам баъди рафтани Умар Ҳофиз. Омадам ин сӯ, ҳарчанд аз ману ту, Мирзо ба Умар Ҳофиз шояд мӯ барин мадад нарасад. Аммо дил намонд, ки ман ҳам шишта бошам дар Исфара. Чуноне ки дили ту намонд шишта бошӣ бепарвою бетараф дар Исфара...

Асомиддин хомӯш монд ва ба асояш аз нав вазни худашро партофт.

Акнун мӯйсафеди бемадори асобадаст ва як наврас, ки аз дасташон коре намеомад, мерафтанд ҷониби кӯҳистони бесару нуги беҳаду худуд, ки қуллаҳои зиёдашон дили осмонро чок мекард, мехарошид. Мерафтанд барои дарёфти Умар Ҳофиз. Балки онҳоро мебурд ҷониби кӯҳистони душворбарои азамати хатарбора кину газаби ниҳони дилашон нисбати Умари дузду хунхорае.