§5.8. Иттиҳоди иқтисодии Африкаи Ғарбӣ

Иттиҳоди иқтисодии Африкаи Ғарбӣ дар байни тамоми созмонҳое, ки дар қитъаи Африка бунёд гардиданд, яке аз калонтарин гурӯҳҳои иқтисодӣ мебошад ва он бо мақсади аз ҷиҳати иқтисодӣ мустаҳкам кардани кулли давлатҳои аъзои ЭКОВАС ҳанӯз соли 1975 бунёд карда шуда буд.

Ба ҳайати Иттиҳоди иқтисодии Африкаи Ғарбӣ давлатҳои Бенин, Ҷазираҳои Соҳили Оҷ, Буркина-Фасо, Гамбия, Гана, Гвинея, Гвинея-Бисау, ҷазираҳои Мисаи Сабз, Либерия, Мавритания, Мали, Нигер, Нигерия, Сенегал, Сиерра-Леоне ва Того дохил мешаванд. Аз пешрафти иқтисодии давлатҳои аъзои ЭКОВАС Иттиҳоди иқтисодии давлатҳои Африкаи Марказӣ (КЭЕАС) рӯҳбаланд шуда, соли 1977 бо кулли давлатҳои аъзои худ (Бурунди, Габон, Зоир, Камерун, Конго, Руанда, Сан-Томе ва Принсипи, ҶАҶ, Чад ва Гвинеяи Экваториалӣ) ба ҳайати созмони ЭКОВАС дохил гардиданд.

Муносибатҳои иқтисодӣ ва тиҷоратии байни давлатҳои аъзои ЭКОВАС дар асоси созишномаи клирингӣ ва созишнома дар бораи пардохтҳо ба роҳ монда шуда буд.

Клиринг ҳамчун меъёри асосии муайянкунандаи арзиши аслии мол, чи дар робитаҳои дуҷониба ва чи дар робитаҳои бисёрҷонибаи давлатҳои аъзои ЭКОВАС истифода бурда мешуд.

Дар робитаи давлатҳои алоҳидаи аъзои ЭКОВАС бо кишварҳои ҳамсояи дигар созмонҳо меъёрҳои муайян намудани арзиши мол барои пешбурди робитаҳои дуҷониба истифода бурда мешуданд.

Хусусияти хоси созишномаи клирингӣ дар давлатҳои Африка аз он иборат буд, ки баробари дар муомилот будани пули миллии давлатҳои аъзо хариду фурӯш бо он ба анҷом расонида мешуд. Клиринг дар робитаҳои иқтисодӣ ва тиҷоратии давлатҳои аъзои ин созмон истифода бурда мешавад. Бояд зикр намуд, ки дар робитаҳои иқтисодии хориҷии давлатҳо истифодаи меъёри муайяни клирингӣ нисбат ба асъори шинохташудаю қудратноки ҷаҳон (доллари ШМА,