§14.9. ҶУМҲУРИИ ИСЛОМИИ ПОКИСТОН

Бо саршавии Ҷанги дуюми ҷаҳон дар ҳудуди давлатҳои Осиёи Ҷанубӣ муборизаҳои пайдарпаи аҳолӣ таҳти роҳбарии иҷлосияи ҳизби «Лигаи мусулмонон» сар шуда буд.

Мувофиқи барномаи тасдиқшуда иҷлосияи ҳизби «Лигаи мусулмонон» мақсади аввалиндараҷаи муборизаҳои сиёсӣ дар қисмати шимолии Ҳиндустон таъсис намудани ду давлати соҳибистиқлоли мусулмон буд.

Дере нагузашта нақшаҳои пешбинишуда амалӣ гардиданд. Дар зери таъсири ҳаракати пуризӯри миллӣ-озодихоҳӣ Британияи Кабир маҷбур гардид, ки ба мустамликаи худ истиқлолият диҳад.

7 августи соли 1947 истиқлолияти Покистон эълон гардид ва пешвои «Лигаи мусулмонон», ходими бузурги сиёсию давлатӣ Муҳаммад Алӣ Ҷиноҳ ба ҳайси нахустин роҳбари он пазируфта шуд.

Таъсиси ду давлати мустақил — Покистону Ҳиндустон дар он замон дар кулли минтақаи давлатҳои Осиёи Ҷанубӣ ва умуман давлатҳои Шарқи Наздик ғалабаи бузурге ба ҳисоб рафта, муборизаҳои озодихоҳии миллатҳои дигарро низ тезонид.

Ба ду давлати ҷудогонаи соҳибистиқлол тақсим шудани як давлати бузург, то охир ҳал нашудани масъалаҳои ҳудудии ҳар ду тараф, афзудани монеаҳо дар муҳоҷирати пуштуҳо аз Ҳиндустон ва ҳиндуҳо аз Покистон муносибатҳои ин ду кишварро мураккаб гардонид.

Бояд таъкид кард, ки англисҳо дар давраи мустамликадории худ ба равнақу ривоҷ додани соҳаҳои саноати вилоятҳои Панҷоб, Синд, Балучистон, музофотҳои сарҳадии шимолу ғарбӣ ва Кашмир, ки он солҳо ҳудуди давлати Покистон ба шумор мерафт, эътибори кофие намедоданд.

Ин аст, ки ба Покистони соҳибистиқлол иқтисодиёти қафомондае боқӣ монда буд.

Дар соли 1948 соҳаи саноати мамлакат ҳамагӣ 1,4 фоизи даромади миллиро таъмин менамуд. 90 фоизи аҳолии мамлакат дар соҳаи кишоварзӣ кор карда, дар деҳот умр ба сар мебурданд.