Ҷанговарон акнун паси миз менишастанд, ки Першин ҳам омад. Вай баъди он ки дар роҳ назди ҳавзи сунъӣ аз болои асп афтид, ҳоло ҳам андак мелангад.
Пештар ӯро ба штаби Бухоро даъват кардаанд. Дар штаб ба ӯ чӣ мегӯянд? Шояд ба дигар ҷой ба кор мефиристанд? Ба назари Чернов омад, ки ӯ каме логар шудааст. Айби худаш, бо бачаҳо чандон унс нагирифт. Першин ба ҳама даст доду дасти дарозкардаи Манучеҳрро нагирифт. Манучеҳр дар назди рафиқон шарм кард.

• Инҳо ҷангӣ, - Загорский як карч харбузаро назди Чернов гузошту оҳиста афзуд: - Барои кадом як қадаҳ, ки аз хазинаи амир гирифтаанд, ба гап мераванд. Манучеҳр Першинро дузд мегӯяд. Першинро агар намедоштаанд, ӯро мепарондааст.

• Парондан ба ӯ осон будааст? - Чернов сигор гиронд: - Зудтар ягон тараф мегузаронданд, хуб буд.

Семёнов аллакай ширакайф шуда, бо ҳамшаҳриҳояш сӯҳбат мекард.
Загорский барои хурсандии давра ба Манучеҳр гап партофт:

• Иди шумо қай, Манучеҳр?

• Иди мо? - Манучеҳр забон хоид. - Иди мо рӯзе, ки ба майдони Регистон даромадем.

• Як воқеаи ҳамон рӯзи ҷанг то ҳол норавшан монд, - Загорский сӯйи
  Чернов нигарист, пас бо овози баландтар ба Манучеҳр гуфт: - Оқибати ҳамон
  ҷанг бо салладор, ки ҳамдигарро занукӯб карда, ба кӯчаи танг даромада рафтед, чӣ шуд?

Манучеҳр суп-сурх шуд. Вай аз он салладор ва аз гаппартоии рафиқон қимоб шуда буд. Вале дар давра худро дошта, ҳарчӣ оромона гуфт:

• Ун салладор ҳарвақт аз дӯзах пайк мефиристад, ки Пётрро кайҳо боз воҷибулдафъ асту чаро дер мекунад?

Семёнов базӯр хандаашро дошта, сухани Загорскийро тақвият дод:

• Ман ҳам ҳаминро пурсиданӣ будам. Дина бегоҳӣ ҳамон салладорро дар бозор дидам, самбӯса мефурӯхт. Маро шинохту ба чӯраат Манучеҳр салом расон, - гуфт.

Ҳама хандиданд.

• Рафиқ лейтенант, шумо додарафро дидед, - гуфт Манучеҳр як зарра дигар нашуда. - Вай бо Петро дӯсти қарин.

Чернов гоҳ хандидаю гоҳ ҷиддӣ шуда, ҳамаро бо иди зафар аз болои армияи Колчак ва амири Бухоро табрик карда, пас ҷониби Манучеҳр дӯстона афзуд:- Ман намедонам, оқибати кори он салладор чӣ шуд. Лекин имрӯз ҳуҷҷат омад, ки Мирзоев Манучеҳр барои корнамоӣ нишон доданаш бар зидди душманони инқилоб бо ордени “Байрақи сурх” мукофотонида шудааст. -Чернов дар қатори мукофотгирифтаҳо номи сарбози лабҷок Тараев Тимофей Иосифовичро, ки дар майдони Регистон қаҳрамонона ҷангидаю ҳалок шуда буд, низ хонд.

Ҳама хурсанд буданд. Фақат Першин, ки ҳам Манучеҳру ҳам Семёновро хуш надорад, ба ҷабинаш чин андохта нишастааст. Вай барои ба мукофот пешниҳод кардани Манучеҳр зид буд... Фурсате гузашту ҷумчаи наздашро дуртар тела дода афтонд ва дилашро кафонд.