ФАСЛИ ЧОРУМ

Ҳукумати Бухоро маҷлиси фаъолонро бо фотеҳони худ - намояндаҳои Ҷабҳаи Туркистон ва Маскав якҷоя баргузор кард. Дар пештоқи толор бо ҳарфҳои калон “Ҳама барои фронти шарқӣ!” навишта шудааст. Аз рафти кору чеҳраҳои тираи намояндаҳо ва нигоҳҳои хастаи сардорони ҳукумат маълум аст, ки дар маҷлис гуфтушунид ба сахтӣ хоҳад гузашт. Вазъият дар ҳақиқат хатарнок буд. Дар қисмати ғарбии Русия душманони инқилоб дар тараддуди кушодани фронти нав буданд. Дар Шарқи Дур белогвардейсҳои дар Хитой ҷамъомада кӯшиши зада даромаданро доштанд. Илова бар ин амири Бухоро, ки гурехта буд, тавонистааст армияи ҷилҳазора ҷамъ карда, ҳаваси боз пас гирифтани тахташро кунад.

Пленум то ними шаб давом кард; рӯзи дигар намоянда Назаров Сергей Назарович, марди тануманди чашмтанг, назди рафиқонаш лоф зад: гуфта-гуфта ҳам дили худам ва ҳам дили рафиқони Маскавро холӣ кардам. Ва рост ҳам гуфт, дар оғози маҷлис ҳисоботи ду нафарро гӯш карда, ба сухан баромад:

• Мегӯед, ки мардум дар бисёр ҷойҳо шӯриш бароштаю шӯрохоро задаю барҳам додаанд, гӯшу бинии коргарони ревкомро бурида, таҳқир кардаанд. Мардуми таҳҷоӣ бо шумо ҳамкорӣ намекардаанд, фарзандҳояшонро ба хизмати ҳарбӣ намедодаанд, бештари заминҳо нокорида мондааст.-Назаров ба қатори фаъолони дар пеш нишаста зеҳн монда, бо оҳанги маслиҳат пурсид:- Ҳамин тавр?- Ва ҳамоно лаҳни суханашро ба таъна гардонда, идома дод:- Аммо сафи ба партия медаромадаҳо меафзудааст! Дар панҷ моҳ сафи аъзои партияи Ҷумҳурии Халқии Бухоро се маротиба афзудааст. Рекорд! Чунки мансаб лозим! Ин мардум мансаба аз фарзандаш, балки аз ҷонаш ҳам бештар дӯст медорад. Ин феъл аз манғитиҳо мерос мондааст. - Назаров таваққуф кард ва боз ҳам аз одамони ҳукумат, ки дар қатори пеш нишастаанд, пурсид: -Ё нодуруст мегӯям?- Ва ҷавобро интизор нашуда, ба истеҳзо ва таҳдиди бештар афзуд: - Мардум кӯр не! Мардум дид, ки ҳукумати амир саллаю дастори калон дошту риши дароз, ҳукумати нав шапка дораду дар лабонаш папирос, дар миёнаш наган ва савлат! Аммо худаш мубтало буд, мубталотар шуд! Мардум дид, ки шумо ноӯҳдабаро, танбал, нобалад. Давлататон чун кӯдаки ношуд ба по намеистад: чунин дигаргунии шармандаоварро диду аз шумо дил канд! Дар оянда бухорӣ ҳатто бо шумо хешӣ намекунад! Доманаш расад, бурида мепартояд! Шумо вақт ёфтаю бо Эрону Туркия ва кадом давлатҳое шартномаҳо бастед, аммо натавонистед, ки замини амиру беку муллоҳоро, ки чор моҳ боз бекор хобанд,