Семёнов шитобид. Ва худаш низ наганашро бароварда он сӯ асп монд. Ва раҳораҳ мушоҳида кард, ки ҳарифи Семёнов ҷавони чолок аст. Ҳаму рост шуд, устокорона аз зарбаҳои Семёнов мегурезад. Яқин, ҷавон човандоз аст. Чернов дар ҷангҳои Фарғона дида буд, ки човандозҳо саворони чобуканд. Ҳангоми мусобиқаҳо тангаро аз замин мебардоранд. Аммо Чернов ҳанӯз наздик нашуда, Манучеҳр расида бо шамшер ба китфи ҷавон заду зуд лаҷоми аспашро гирифту танҳояшро ба замин тела дод. Аммо андак монда буд, ки Манучеҳр ҳам сарашро барбод диҳад. Ҳасани ҷувоз ба сарвақташ расида, пеши роҳи ҷавони хузарберо, ки бо шамшери кин наздик омада буд, дошт. Дукаса ба душман ҳуҷум карданд, ки ҷавони хузарб хатари маргро дида, зуд сари аспи бузургҷусаашро гардонд.
Чернов аз пасаш куланги тапончаро зер кард ва дарҳол тир надоштани он ба хотираш расид. “Ҳоло аҷалаш нарасида будааст!” гузашт аз дилаш.

Ҷанг шиддат гирифт. Дар тарафи чапи майдон дастаи Загорский харобе мекард. Сержант Сергеев Сергей, ки взводи Загорскийро қабул карда буд, бо ду нафар муҳориба карда, якеро ба шоф ба китфаш зада афтонд, дуюмӣ саросема сари аспашро гардонда гурехт. Он ҷо аз ҳарду тараф захмиҳо бисёранд.
Полки самарқандӣ дар наздикии баландӣ ҷанг дорад. Дар даромадгоҳи бозор полки 1-уми аз Ҷузор омада пеши фавчи гурӯҳҳои тозаомадаро мегирад. Полки 3-юми сарҳаддӣ ҳам дар наздикии онҳост. Исоев дар ҳамон ҷо. Худаш ҳам ба ҷанг даромадааст. Вай дар ҷанги якуми ҷаҳонӣ иштирок кардааст. Аз соли 1917 бо хоҳиши худ ба Армияи сурх мегузарад. Ба сифати сардастаи артилерия дар фронти Моварои Каспӣ хизмат кардааст. Дар озод кардани Уралск ва Хева иштирок карда, бо ордени Байрақи Сурхи ҷангӣ мукофотонида шудааст.
Ба гуфтаи Манучеҳр, ки аз ҳама гап бохабар аст, баъди он ки Исоев бо тӯп манораи Бухороро мезанад, ӯро “Исоеви манора” лақаб мемонанд. Аз кӯчаи Шутурбанд омадани дастаҳо ҳеҷ кам намешавад ва Муҳаммадшариф хабар овард, ки Исоев қисме аз полки 8-уми эҳтиётиро низ ба ҷанг даровард. Чернов мушоҳида кард, ки дастаҳои аз кӯчаи Кулолгаргон меомадаро Романенко бо пулемиёт зада пас мегардонад. Назараш ба сарбози ротаи 3-юм Володя Барасевич афтод, ки марди тануманди ба сараш шамшер кашида омадаро ба тир зада ғалтонд. Баъд чобуксавори ҷомаю салладоштаро дунбол гирифту ҳарду сӯйи баландӣ асп монданд. Аспи ҳарифаш чолокӣ карда пеш гузашт. Дар ин вақт савори сурхрӯи бурутдоре аз паси Барасевич аспашро камчинкорӣ карда, бо ӯ баробар шудан хост. Барасевич аз пасад омадани душманро пай бурда, аспашро ба шаст пас гардонд. Асп мувозинаташро гум карда наздик буд, ки ба паҳлу меафтид. Дар ҳамин лаҳза ҳариф бо корд ба байни шонаҳояш зад. Ва ба сагрии аспаш ҳам корд зад, ки асп хез гирифту Барасевич бо сар ба замин зад. Асп пеш по хӯрда, ба болояш афтид. Сару синаи Барасевич тағи асп монда буд. Чернов ба сӯи бурутдор тир паронд, аммо тираш нарасид. Лаҳзае пас дид, ки як гурӯҳ ҷангиҳо аз роҳи поён баромада, ба полки самарқандӣ фишор меоранд. Вале ҳуҷумашон дер давом накард. Сарбозони полки 3-юми сарҳаддӣ ба имдоди полки самарқандӣ омаданд. Чернов ҳис кард, ки рӯзи кӯтоҳи зимистон аллакай аз ним гузаштааст. Андак пас навкариҳои нимтанаи туркипӯш ноаён корзорро тарк карда, ба даруни бозор ақибнишинӣ карданд. Ҷавонони содаи