Шохҳояш дар ду тарафи чархи велосипед, гўшҳояш дар ду бари зин овезон. Каллаи гов хеле калон аст. Кўдакон боэҳтиёт каллаи говро ба хонаи говкуш мебаранд. Ҳамчунин як расмест дар куҳистон. Чун говро куштанд, каллаи говро ба хонаи устои говкуш мебаранд. Почаҳояшро низ.
Пўсти говро дар канори бетонии бора, дар он ҷое, ки ҳавлӣ ногаҳонӣ бурида мешавад, намак зада паҳн густурдаанд. Думи гов дар лаби бораи бетонии ҳавлӣ овезон аст.
Гурбачаҳо бо думи гов бозӣ доранд дар поёни бораи бетонӣ.

Аз кўча тележкаи пурбор мегузарад. Коҳ дорад. Коҳи зард аз борти баланди симтур тоқа- тоқа мерезад. Бо чеҳраи пур аз коҳи зард, дар болои ғарами коҳ, мардаки мошбуруте нишаста, ба олами атроф аз баландии тележка нигоҳ дорад: худбинона, баландназар, тоқии куҳнааш ба болои абрў хамидааст. Пушти сарашро хорон- хорон панҷшохи хамухез мекардаро медорад. Ҳар ду ором мегиранд, тележка мегузарад.
Одамон дар назди магазин, дар сояи чинор чизеро муҳокима мекунанд. Хеле андармони гуфтугўянд. Касе онҳоро овоз медиҳад, аз кўчае, ки ба хонаи Ҳидоят мебарад. Ҷавонмарде онҳоро садо мекунад:

• Ба хонаи Ҳидоят дароед!
• Чӣ гап?
• Писараш аз аскарӣ омадааст.
• Э наход!..
  Одамон аз назди масҷиди партовӣ мегузаранд. Девори боронхўрдаи масҷид фатарот аст. Болои боми масҷидро шифер гирифтаанд: саросема, беҳавсала ва бо беэътиноӣ.
  Саҳни ҳавлии масҷидро шўра задаст. Панҷараи чўбини ҳавлиро алаф зер кардааст. Чапараки борики он симпеч аст.
  Як қулфе дар занҷири дарозе овезон.
  Одамон аз назди чапараки масҷид мегузаранд. Ҳатто нигоҳе ҳам ҷониби деворҳои фатароти масҷид намеандозанд, чунки аз ин роҳ бисёрҳо гузаштаанд ва ба манзараи ҳузнангези масҷид одат кардаанд.