Паритет-кайҳоннаварди 1-2,
Паритет-кайҳоннаварди 2-1.
Истгоҳи мадории «Паритет».
Поси саввум. Шабонарӯзи 94-ум.

Расо дар мӯҳлати таъиншуда, дар соати ёздаҳ ба вақти Шарқи Дур ба саҳни киштии ҳавопаймобари «Конвенция» пайи ҳам ду ҳавопаймои реактивӣ фуруд омад ва комиссияҳои ваколати махсус доштаро аз ду тараф — тарафҳои американӣ ва советӣ овард.

Аъзоёни комиссияро қатъиян мувофиқи расмияти қабулшуда истиқбол гирифтанд. Ба онҳо эълон намуданд, ки барои наҳорӣ ним соат вақт дода шудааст. Аъзоёни комиссия мебоист дарҳол пас аз наҳорӣ дар кают-компания ба машварати пӯшида барои муҳокимаи вазъияти фавқулоддае, ки дар истгоҳи мадории «Паритет» рух додааст, ҷамъ неомаданд.

Машварат сар шуд, вале муддате нагузашта, банохост қатъ гардид. Кайҳоннавардони муфаттиш, ки дар истгоҳи «Паритет» буданд, ба сафинаи «Конвенция» ба номи Мармутидор ахбори аз паритет-кайҳоннавардони 1-2 ва 2-1 аз Олами Афлоки ҳамҷавор, аз сайёраи Пайкараи Ҷангалистон гирифтаашонро нақл намудаанд.

IV

Қаторҳо дар ин ноҳия аз шарқ ба ғарб мегузаштан-ду аз ғарб ба шарқ...

Аз ду самти роҳ дар ин ноҳия Сари Озек, ба қавли мардуми таҳҷой, Мардумаки зарди биёбон, яъне Миёнадаштҳои малларанги нопайдоканор тӯл мекашиданд.

Дар ин ноҳия ҳама гуна масофаҳоро дар қиёси дур ё наздик будани роҳи оҳан чен мекарданд, чунон ки дар дигар ҷоҳо дар қиёси хати Гринвич чен мекунанд...

Оре, қаторҳо аз шарқ ба ғарб мерафтанду аз ғарб ба шарқ...