Берун аз ин база нишондиҳандаҳои таҳлилшаванда (маҷмӯи хароҷоти доимӣ, нархи фурӯши воҳиди маҳсулот ва ҳиссаи хароҷоти тағйирёбанда) аллакай доимӣ ҳисобида намешаванд. Ҳама гуна натиҷаи ҳисобҳо бо формулаҳои оварда ва хулосаҳое, ки дар асоси онҳо бароварда шудаанд, дар ин сурат нодуруст хоҳанд буд.

Усули графикӣ. Нуқтаи безарариро бо истифода аз ин усул муайян кардан мумкин аст.

График аз чор хатти росте иборат аст, ки «рафтори» хароҷоти доимӣ, хароҷоти тағйирёбанда, ҷамъи хароҷот ва маблағи фурӯшро тасвир мекунанд (расми 7.1).

Расми 7.1. Графики безарарӣ.

Дар меҳвари абсциссаҳо ҳаҷми фурӯш (гардиши мол) бо воҳидҳои аслӣ, дар меҳвари ординатаҳо — хароҷоту даромад бо ифодаи пулӣ гузошта мешаванд. Нуқтаи буриши хатҳои ҷамъи хароҷоти мустақим ва маблағи аз фурӯш бадастомада аз вазъи мувозинат дарак медиҳад.

Дар назар бояд дошт, ки усулҳои зикршудаи таҳлилро танҳо зимни қабули қарорҳои кӯтоҳмуддат истифода бурдан мумкин аст.
Аввалан, коркарди тавсияҳо барои дурнамои дарозмуддат бо ёрии онҳо имконнопазир аст. Сониян, таҳлили безарарии истеҳсолот зимни риоя гардидани шарту таносубҳои зерин натиҷаҳои боэътимод хоҳад дод:

• хароҷоти тағйирёбанда ва маблағи аз фурӯш бадастомада аз сатҳи
  истеҳсол вобастагии мустақим доранд;