Дубора, кош, ояд, Худо,
Оҳ, он замони нозанин!
Хорему зорему низор,
Бо ормони нозанин.

Бигрифта чиниёни маст
Дасти занони нозанин.
Бин чиниёни рӯхунук
Масти занони нозанин!

Бинӣ бубину чашму рӯ,
Ҳайфи занони нозанин!
Дар хок бодо инчунин
Кайфи занони нозанин!

Ҳо, рӯи миллат чун шавад?
Эй гулрухони нозанин!
Ин гулрухон расво кунанд,
Эй гул, рухони нозанин!

Ширинтар аз ҷонҳо, дареғ,
Войи лабони нозанин!
Ширинсароӣ, во дареғ,
Войи забони нозанин!

Оҳ, эй Худои нозанин

Оҳ, эй Худои нозанин,
Дар ин сарои нозанин
Имрӯз моро мекушад,
Оҳ, ин балои нозанин!

Ширину шӯрак медиҳад
Дашномҳои нозанин.
Ҳай ном аз ину он барад,
Хуш номҳои нозанин.

Дар дасти ман мезад агар
Дар давраҳои нозанин,
Мебурдамаш рӯ-рӯи даст
По дар ҳавои нозанин.

Мекуштамаш ранги чароғ
Дар шомҳои нозанин.
Мекуштамаш чун кабки маст
Дар домҳои нозанин.

Мекуштаму мехӯрдамаш
Бо иштиҳои нозанин.
Ёд, эй Худо, мекардамаш
Бо куштаҳои нозанин.

Ман холаашро куштаме,
Зад вой-вои нозанин.
Имрӯз даври ӯ расид,
Сад вой-вои нозанин!

Бигзор, моро ӯ кушад
Бо нозҳои нозанин!
Овоза созад бар ҳаво
Парвозҳои нозанин.

Моро кушад бо дасти худ –
Бо дастҳои нозанин.
Моро кушад ӯ масти худ
Бо мастҳои нозанин.

Дорам дуои нозанин
Бо зораҳои нозанин,
Эй, нозанинамро накуш,
Оҳ, эй Худои нозанин.