Эй вой, дили падар, дили хуншораш,
Лах-лах шуда чун ҷигар дили хуншораш.
Доғ аст дилаш, ҳазор доғ аст дилаш,
Сӯзанда зи доғ чун чароғ аст дилаш.

Дар сояи давлати падар осоям,
Дидӣ, писарам, ки чун писар осоям?
Ду соя ба сар, эй писари ҷон, дорӣ,
Ду сояи меҳрубон сари ҷон дорӣ.

Дар гӯшаи долони калони падарам,
Як сина пур аз оҳу фиғони падарам.
Долони пури падар, ки холӣ мондаст,
Бо дидаи тар падар хаёлӣ мондаст.

Дар сӯфаи худ нишаста танҳо падарам,
Сӯфӣ шудаву шикаста танҳо падарам.
Танҳо падарам, як сари танҳо падарам,
Хоки раҳи ғам бар сари ман, ҳо падарам.

Долони баланди барҳавои падарам
Гиряд чу дилам дигар барои падарам.
Девору дари палағдаи хонаи мо,
Э вой, бияфтад ба сари шонаи мо.

Тасбеҳ ба дасти падарам гардон аст,
Чун ашк ба чашмони тарам гардон аст.
Чун даст барам дигар ба пои варамаш?
Бо пои варам дигар куҷо мебарамаш?

Гаҳ бар дару девори падар менигарам,
Гаҳ бар тани бемори падар менигарам.
Рӯ бар дару девори падар мегирям,
Рӯ бар тани бемори падар мегирям.