Дубораи ду дигар нахезӣ,
Ҳуч карда ба сар агар занемат.
Моро сари тарс аз касе нест,
Пат-пат накунӣ, ки меканемат.
Поро кашӣ аз хати кашида,
Якбора ду пора мекунемат.
Чоки даҳанат бубанду накшо,
Ҳушёр бишав, ки нашканемат.
Безор шавӣ зи ҷони ширин,
Гуфтем чие, чунон кунемат.
Ҳе, лаб накушо, ки мекушемат,
Огоҳ дигар намекунемат!

Эй тоҷики сарбаланд, бархез!

Эй тоҷики сарбаланд, бархез.
Бархез, бикан ту банд, бархез!
Хокат, ба Худо, ки бод карда,
Эй, бар сари ту паранд, бархез!
Ганҷат сари бод мебаранде,
Гӯрат сари пар кананд, бархез!
Онон, ки хӯранд мору каждум,
Як рӯз туро хӯранд, бархез!
Эй, хурмаи гӯши хеш бишкан,
Эй, чуст камар бибанд, бархез!
Баркан пари беғамони пургӯ,
Ҷоғи ҳамаро бибанд, бархез!
Афсона раҳо бикун, раҳо шав
Аз доми балову банд, бархез!

Эй шоми сияҳ, саҳар надорем
(Нолаи як бечора)

Эй шоми сияҳ, саҳар надорем,
Дар дил ҳавасе дигар надорем.
Як модари зору чор хоҳар,
Ду додари ҷон, падар надорем.