Гуфтам ба ду бӯса куштиям, гуфт:
Зиндат бикунам ба чор бӯса.
Гуфтам дуву чор агар чунин аст,
Чун мешавам аз ҳазор бӯса?
Во, пеши бараш яке кушодам,
Гуфтам кунадам чӣ кор бӯса?
Гуфто, ки ту мешавӣ биҳиштӣ
Бо сесаду шасту чор бӯса.
Гуфтам, ба Худо, агар чунин аст,
Бо ман чӣ кунад ҳазор бӯса?
Гуфто, ки агар биҳишта дидӣ,
Бар сабза занӣ ҳазор бӯса.
Сад бӯса задам, биҳишт рафтам,
Кардам ба ҳавас анор бӯса.
Эй, бар лаби Кавсар омадам, гуфт:
Зан бар лабаше ҳазор бӯса!
Гуфтам, ки шумора гум шуд, эй вой,
Гуфт оши ту бешумор бӯса!

Гуфтам, ки бидеҳ, нигор, бӯса

Гуфтам, ки бидеҳ, нигор, бӯса,
Хуш маст шавам ба чор бӯса.
Гуфто, ки накун ба бӯса шӯхӣ,
Дорад, ба Худо, хумор бӯса.
Гуфтам чӣ хаёл кардиям, ҳей?
Ман мехӯраме, биёр бӯса!
Гуфто, ба Худо, ки нест бозӣ,
Бошад агар обдор бӯса.
Мо харбуза мехӯрем гуфтам,
Савганд, ба як ҳазор бӯса.
Гуфто, ба Худо, надидаӣ, оҳ,
Эй ҷӯра, ту ширадор бӯса.
Гуфтам, ба Худо, чӣ ҷои тарс аст?
Ку, бест, занам ҳазор бӯса.
Гуфто, ки агар ту зӯр бошӣ,
Зан ку, ҳамагӣ ду бор бӯса.