бораи натиҷаи он ба мақомоти намояндагии кормандон гузориш диҳад. Дар сурати собит шудани ҳуқуқвайронкунӣ, корфармо вазифадор аст ба роҳбари ташкилот, сардори воҳиди сохторӣ ва муовинони онҳо чораҳои интизомиро ба ҳадди то аз кор озод кардан, татбиқ намояд.

Ҷавобгариҳои махсуси интизомӣ бо қонунҳо, низомномаҳо ва оинномаҳои интизомӣ танзим карда мешаванд. Ҷавобгарии махсуси интизомӣ аз ҷавобгарии умумии интизомӣ бо ин фарқ мекунад:

• бо доираи шахсоне, ки нисбаташон татбиқ мегардад;
• бо мафҳуми васеътари кирдори интизомӣ (хизматӣ);
• бо номгӯи чораҳои ҷавобгарӣ;
• бо доираи салоҳияти шахсони мансабдор дар татбиқи ҷазои интизомӣ;
• бо тартиби татбиқи ҷазоҳои интизомӣ.

Ин масъалаҳо бештар дар оинномаҳо оид ба интизоми кормандон ва хизматчиён дар соҳаҳои алоҳида пешбинӣ мегарданд. Масалан, Қарори Маҷлиси намояндагони Маҷлиси Олии Ҷумҳурии Тоҷикистон аз 10 декабри соли 1999, № 868 "Дар бораи тасдиқи Оинномаи интизомии Қувваҳои Мусаллаҳи Ҷумҳурии Тоҷикистон", Фармони Президенти Ҷумҳурии Тоҷикистон аз 23 июни соли 2015, № 510 "Дар бораи Оинномаи интизомии Агентии назорати маводи нашъаовари назди Президенти Ҷумҳурии Тоҷикистон", Қарори Ҳукумати Ҷумҳурии Тоҷикистон аз 31 октябри соли 2014 № 692 "Дар бораи Оинномаи интизомии мақомоти гумруки Ҷумҳурии Тоҷикистон".