11.3.1.Рухсатии меҳнатии ҳарсолаи пардохтшаванда: мафҳум, намудҳо ва тартиби додани онҳо

Ба кормандон рухсатии меҳнатии ҳарсолаи пардохтшаванда бо нигоҳ доштани ҷои кор (вазифа) дода мешавад. Яъне рухсатии ҳарсолаи пардохтшаванда ҳамчун вақти мунтазами фориг аз кор эътироф карда мешавад, ки дар давоми он корманд ҷои кор (вазифа) ва музди миёнаи меҳнати худро нигоҳ медорад.

Рухсатии меҳнатии ҳарсолаи пардохтшаванда барои истироҳат ва барқарорсозии пурраи қувваи корманд пешбинӣ шудааст, зеро маҳдуд кардани давомнокии рӯзи корӣ (ҳафтаи кории 40-соата ё кӯтоҳкардашудаи вақти корӣ), истироҳати ҳаррӯза (байнибастӣ), рӯзҳои истироҳат ва рӯзҳои иди ғайрикорӣ барқароршавии пурраи кормандро барои қонеъ намудани талаботи ҳаётии муқаррарии ӯ, таъмин карда наметавонанд. Дар баробари функцияи барқарорсозӣ, рухсатии меҳнатии ҳарсолаи пардохтшаванда барои қонеъ кардани дигар манфиатҳо ва эҳтиёҷоти корманд нақши назаррас дорад, масалан, баланд бардоштани сатҳи маълумотнокии умумӣ ва фарҳангӣ ва ғайра. Ҳуқуқи корманд ба рухсатии меҳнатии ҳарсолаи пардохтшаванда бо ягон чиз маҳдуд карда намешавад. Шарти ягона барои истифода аз ин ҳуқуқ мавҷудияти муносибатҳои меҳнатӣ байни корманд ва корфармо мебошад. Кормандон тибқи шартномаи меҳнатӣ новобаста аз намуди ташкилоте, ки дар он кор мекунанд, дараҷаи шуғл (вақти пурра ё нопурраи корӣ), маҳали иҷрои уҳдадориҳои меҳнатӣ (дар ташкилот ё хона),