Шаҳрвандоне, ки бо корҳои хонагӣ машғуланд, ба таъмини нафақа дар ҳолатҳои пешбининамудаи Қонуни Ҷумҳурии Тоҷикистон «Дар бораи таъмини нафақаҳои суғуртавӣ ва давлатӣ» ҳуқуқ пайдо мекунанд.

Иштироки кормандони хонагӣ дар низоми андӯхти нафақавӣ ҳатмӣ мебошад. Кушодани ҳисоби андӯхти нафақавӣ ва интиқоли ҳаққи суғуртавӣ ба он аз ҷониби корфармо тибқи муқаррароти Қонуни Ҷумҳурии Тоҷикистон «Дар бораи суғуртаи давлатии иҷтимоӣ» амалӣ карда мешавад.

Тартиби муқаррар намудан, таъин, ҳисобу китоб ва пардохти ҳамаи намудҳои кӯмакпулиҳои иҷтимоӣ (кӯмакпулиҳо ҳангоми корношоямии муваққатӣ, ҳомиладорӣ ва таваллуд, кӯмакпулии оилавӣ ва барои дафн) ба кормандони хонагӣ, ки тибқи шартномаи меҳнатӣ дар хоҷагии корфармо – шахси воқеӣ кор (хизмат) мекунанд дар Қонуни Ҷумҳурии Тоҷикистон «Дар бораи суғуртаи давлатии иҷтимоӣ», Қоидаҳои таъин ва пардохти кӯмакпулиҳои иҷтимоӣ ба соҳибкорони инфиродӣ, ки бо Қарори Ҳукумати Ҷумҳурии Тоҷикистон аз 3 марти соли 2011, №117 тасдиқ гардидааст, «Низомномаи тартиби таъмини кӯмакпулӣ тибқи суғуртаи иҷтимоӣ Ҷумҳурии Тоҷикистон» ва дигар санадҳои меъёрии ҳуқуқии Ҷумҳурии Тоҷикистон сурат мегиранд.

Ба кормандони хонагӣ рухсатии ҳарсолаи (асосии) меҳнатӣ бо давомнокии 24 рӯзи корӣ дода мешавад, агар онҳо мутобиқи шартномаи меҳнатӣ ба гирифтани рухсатии ҳарсолаи меҳнатии давомнокии бештар ҳуқуқ надошта бошанд.