фурӯ меравад. Ҳаёт ва мамоти онҳо дар дасти туст. Ҳамаи инро дар хотир нигаҳ дор!

Парӣ газнаро ба дасти Элиза халонд. Элиза сӯзиши дардро эҳсос карда, аз хоб бедор шуд. Ин замон аллакай субҳи равшан дамида ва дар назди ӯ як даста газна ба назар метофт, айнан ҳамон хел газнае, ки дар хоб дида буд. Элиза ба зону зада, Худовандро сипос гуфт ва аз ғор баромад, то дарҳол ба кор шурӯъ намояд.

Ӯ бо дастони нозукаш газнаҳои нешзанандаву сӯзонро ғун меовард. Дастонаш пур аз обила шуда буданд, вале Ӯ ҳамаи ин дардро бо хушнудӣ қабул мекард, зеро мехост бародаронашро наҷот диҳад. Баъд бо пойҳои луч газнаҳоро кӯфту ба бофтани нах шурӯъ кард.

Ҳангоме ки офтоб фурӯ рафт, бародарон омаданд ва бо дидани он, ки хоҳарашон гунг шудааст, беҳад тарсиданд. Онҳо гумон бурданд, ки ин ҷодуи нави модарандарашон аст. Вале чун ба дастони Элиза нигаристанд, фаҳмиданд, ки хоҳарашон барои раҳондани онҳо гунг шудааст. Бародари аз ҳама хурдӣ ба гиря даромад ва қатраҳои ашкаш ба дастони Элиза чакидан гирифтанд. Ҳар ҷое, ки қатраи ашк мечакид, обила нест мешуд ва дард таскин меёфт.

Тамоми шаб Элиза ба кори худ банд буд. Фикри истироҳат кардан ба хаёлаш ҳам намеомад. Ӯ