Яке чашмае дид рахшон зи дур,
Яке сарвболо, дилором пур.

650 Яке ҷоми май баргирифта ба чанг,
Ба сар-бар зада дастаи бўю ранг.

Зи болои ў фарраи эзадӣ
Падид омаду рояти бихрадӣ.

Ту гуфтӣ Сиёвахш бар тахти оҷ
Нишастасту бар сар зи пирўза тоҷ.

Ҳаме бўи меҳр ояд аз рўи ўй,
Ҳаме зеби тоҷ ояд аз мўи ўй.

Ба дил гуфт Гев ин ба ҷуз шоҳ нест.
Чунин чеҳра ҷуз дархури гоҳ нест.

655 Пиёда бад ў низ бинҳод рўй,
Чу танг андаромад ба наздики ўй.

Гиреҳ суст шуд бар дари ранҷи ўй,
Падид омад он номвар ганҷи ўй.

Чу аз чашма Кайхусрав ўро бидид,
Бихандиду шодон дилаш бардамид.

Ба дил гуфт, к-ин гурд ҷуз Гев нест,
Бад-ин марз худ з-ин нишон нев нест.

Маро кард хоҳад ҳаме хостор,
Ба Эрон барад, то кунад шаҳрёр.

660 Чу танг андаромад гави номдор
Баромад зи ҷо Хусрави шаҳрёр.

Варо гуфт: «Эй Гев, шод омадӣ,
Хирадро чу шоиста дод омадӣ.

Чӣ гуна сипардӣ бар ин марз роҳ,
Зи Тусу зи Гударзу Ковусшоҳ

Чӣ дорӣ хабар? Ҷумла ҳастанд шод?
Ҳаме дар дил аз Хусрав оранд ёд?

Ҷаҳонҷўй Рустам гави пилтан,
Чи гуна-ст Дастону он анҷуман?»

665 Чу бишнид Гев ин сухан, хира монд,
Забонро ба номи ҷаҳонбон биронд.

Бад-ў гуфт Гев «Эй сари сарфароз,
Ҷаҳонро ба меҳри ту омад ниёз.

Бар онам, ки пури Сиёвуш туӣ,
Зи тухми каёниву боҳуш туӣ.