Гурозон биёмад ба пардасарой
Дили пур зи дарду сари пур зи рой.

Чу Рустам биёмад, биёвард май,
Ба ҷоми бузург андарафканд кай

Ҳаме гуфт шодӣ туро ёр бас,
Ба фардо нагўяд хирадманд кас.

Куҷо Туру Салму Фаридун куҷост?
Ҳама нопадиданду бо хок рост.

385 Бипўему ранҷему ганҷ оганем,
Ба дил-дар ҳама орзу бишканем,

Саранҷом аз ў баҳра хок асту бас,
Раҳоӣ наёбад аз он рўз кас.

Шаби тира созем бо ҷоми май,
Чу равшан шавад рўз бишмурда пай,

Бигўем, то баркашад ной Тус
Табира бароранд бо кўҳу кўс.

Бубинем, то дасти гардонсипеҳр
Дар ин ҷанг сўи кӣ ёзад ба меҳр.

390 Бикўшему аз кўшиши мо чӣ суд,
К-аз оғоз буд, он чи боист буд.

Баду нек бар мо ҳаме бугзарад,
Хирадманд мардум чаро ғам х(в)арад?

Агар ёр бошад ҷаҳонофарин,
Зи хуни падар бозҷўем кин.

Оғози достони Фуруд – писари Сиёвуш

Ҷаҳондор чун шуд сарафрозу гурд,
Сипаҳро ба душман набояд супурд.

Сиришк андарорад ба мижгон зи ришк,
Сиришке, ки дармон надорад пизишк,

395 Касе к-аз нажоди бузургон бувад,
Зи бешӣ бимонад, сутург он бувад.

Чу бе коми дил банда бояд шудан,
Ба коми касе достонҳо задан.

Сипаҳбад чу хонад варо дўстдор,
Набошад дилаш бо хирад созгор.

Гараш з-орзу боз дорад сипеҳр,
Ҳамон офаринаш нахонад ба меҳр.