Дар маҷлиси онрӯза, ки шоҳидаш будед, ин масъаларо бардошта буд. Пас аз маҷлис, раис худаш аз паи ин масъала шуда, мушкилот муддати 10 дақиқа ҳал гашт, акнун бояд ӯ имзояшро гузошта маошашро гирад. Лекин, ҳам раис ва ҳам шуъбаи молия ҳатто аз наздик шудан ба утоқи усто Салим метарсанд. Ин қадар аз феъли ӯ дар ҳаросанд, медонед-ку чӣ гуна хислат дорад усто, баъзеҳо мегӯянд, ки ҳатто девона аст. Акнун барои онҳо ҷавонмарде лозим буд, ки рафта имзоро гирад, ин ҷавонмард аниқтараш ҷавондухтар ман будаям, номардон, ҳатто рост ба раис рафта сари ӯро гаранг карданд, ки Катюша духтари ҷасур ва ба сухани ӯ ҳама гӯш мекунад. Ҳа, ман ҷасур ҳам бошам, лекин аввалан ҷинси латифам, ҳиссиёт дорам, дилам нозук аст, агар мабодо девонагиаш қапида гулӯямро буғӣ карда кушад, чӣ мешуда бошад?
Ростӣ, дили ҷавонмардон каме ба ӯ сӯхт, зеро мӯйсафед воқеан шахси бениҳоят хашмгин буд ва танҳо рафтан ба назди ӯ барои Катюша хатаре ҳам шояд дошта бошад.