Дар дафтар Анӯшервон бо якчанд қайдҳову рақамҳои овардашуда шинос шуд.
– Ин чиз аз он шаҳодат медиҳад, ки таъсири экранҳоро берун аз экранҳо, дар кӯчаҳои шаҳр, мағозаҳо, бозорҳо, корхонаю, нақлиёт, либос, ашёи рӯзгор, ки моро иҳота мекунанд, мушоҳида намудан мумкин аст. Як гирду атрофатро бубин, писарам, ин қадар эълону рекламаҳои рангобаранги зиёдеро мебинӣ, ки умуман ба ману ту ягон зарурате надоранд.
Лекин тавассути ин усули таъсиррасонӣ моро водор месозанд, ки чизҳои нодаркорро дастрас намоем. Ин рекламаи сабил, яке аз муҳимтарин унсурҳои ҳаёти инсони муосир шудааст, ки мо ҳатто ба таъсири бади он аҳамият намедиҳем ва аз ин лиҳоз, ту дарҳол ба суоли ман посух дода натавонистӣ, – бо чашмони пур аз ҳаяҷон ба ҳамсуҳбаташ назар андӯхта суханашро идома дод усто.
– Имрӯз аз реклама ягон ҷои гурез нест, бо ӯ метавон дар телевизион, радио, интернет, рӯзнома, маҷалла, кӯчаю тангкӯча ҳатто қабристон рӯ ба рӯ шуд, аниқтараш, худи ӯ шуморо ёфта ба домаш гирифтор мекунад.