АЗ МАҶМӮАИ «ШУКӮҲИ ШУКУФТАН»

ДАМ

Наомадам, ки бимонам
Ва мондаму мондам.
Шабонарӯз навиштам,
Навиштаҳои ҷаҳонро
Навиштаму хондам.

Нишастам оё?
Ё
Ҳамраҳи замона давидам,
Чӣ беқарор давидам,
Чӣ ошиқона давидам.

Ба ҳеч ҷо,
Ки расидам,
Дидам,
Дар ин ҷаҳони бузург,
Ҳар он даме, ки барояд,
Шукуфаест ба минқори як парандаи кӯчак.

ХОБ ВА БЕДОР

Шабу ситораву нур,
Парандаҳо ҳама хобу ситораҳо бедор
Ва ман, ки дар қафаси хеш хобу бедорам,
Зи лаҳза–лаҳза наздику
Рафта - рафтаи дур,
Чӣ нақшҳо, ки дар ойинаи дарун дорам.
Дар ин гузори фарозу фуруди рӯзу шабон,
Баландтар парише хоҳад,
Орзуи баланд.
Магар, ки сар ба сар сарнавишт бигзорам .
Ва осмон,
Шаби дарё,
Ситора,
Мавҷи булӯр...

РАБОТ

Работ— инсони маснуъӣ,
Ту, эй султони оянда,
Ки ҳам махлуқию ҳам офаринанда,
Худоро,
Ҳар чӣ мехоҳӣ бикун,
Аммо
Накун рахна ба дунёи даруни мо,
Накуш озодии андешаи моро.

ЧОРШАНБЕСУРӢ