ИН ГУНА МЕШИНОСАМАТ

Покизатар аз ойинаву об,
Равшантар аз саҳаргаҳи дарё,
Пуррозтар зи рӯҳи ситора,
Бетобтар зи синаи дарё.
Ин гуна мешиносамат,
Эй инсон,
Ин гуна омадӣ ту ба ин дунё.

Инак, даме дар ойинаи ҳастӣ,
Бингар, чӣ гуна сохтаӣ худро?

РУЪЁИ АШК

Руъёи ашкам,
Девонаам кард.
Бо ҳастии хеш
Бегонаам кард.
Обод будам,
Бо будани ту.
Ин бе ту будан
Вайронаам кард,
Вайронаам кард

ШЕЪРЕ ДАР КИШТӢ

Кош Маҳтоб
рӯйи дарё буд,
Кош чун орзуи гумшудае,
Моҳ аз дурдаст пайдо буд,
Кош он меҳрубонам ин ҷо буд.

Ин ғизоли рамидаи дили ман,
Ки парешони дашту саҳро буд.
Ваҳ, ки имшаб чӣ волаву шайдост,
Кош одам ҳамеша шайдо буд.

Сафар аз навҷавонӣ орад ёд,
Пурсам аз худ:
Ҷавонӣ оё буд?
Буду дунёи орзуҳо буд.
Кош ғамҳо зи ёди мо мерафт,
Шавқ имрӯз буду фардо буд.

ПАЙИ ЧИЗЕ МЕГАРДАМ

Дар торик— равшан ҷангали руъё,
Парса мезанам, парса мезанам,
Бе чизе мегардам,
Бе чизе мегардам, ки нест.