ЧОРЧИНОР

Деҳаи мо Чорчинор

Чор чинори соз дорад.

Навдаҳои ҳар чинор

Сори хушовоз дорад.

Аз ғайрати бачаҳо

Чорчинори мо хуррам,

Суффаҳои озода

Ҳамеша пури одам.

Роҳгузарҳо шодона

Ба ин ҷо мебиёянд:

Дар сояи чинорҳо

Нишаста меосоянд.

ДАР ТАГИ ЧИНОР

Деҳаи мо калон аст,

Атрофаш кўҳистон аст.

Дар назди ҳавлии мо,

Як чинори хушнамо.

Чанори гумбаз барин,

Манори чилгаз барин.

Ҳар пагоҳӣ пас аз кор,

Бар сояи ин чинор,

Одами бисёр ояд,

Хурсандиҳо физояд.

Одамони гуногун,

Бо чеҳраҳои гулгун,

Аз кору бори рўзгор,

Суҳбат кунанд ҳар бор.

Аҳлона ҳамчун як тан

Таги чинор омадан

Одати мардум шудаст,

Номи ғайбат гум шудаст.

Бесардору бераис,

Барпо мегардад маҷлис,

Ҳал мешавад ҳар боре,

Масъалаи бисёре.

Оғоз ёбад аз ин ҷо,

Кори бенуқси фардо.

ЧӮПОНӢ

Дар домани кўҳу дара,

Дар марғзорони сара,

Дар дашту саҳрову чаман,

Бошад макони сайри ман.

Корам басо душвору зўр,

Дорам басо аз вай ҳузур.

Баррачаҳои беқарор,

Боду ҳавои беғубор.

Овози оби шаршара,

Оҳанги кабкони дара,

Долу дарахти бешазор

Монанди бўи навбаҳор,

Бар ман ҳаловат медиҳанд,

Дармону қувват медиҳанд.

Ман ҳокими кўҳу камар,

Шодам аз ин касбу ҳунар.

МАЙДОН

Аз деҳи мо болотар,

Дар домани ҳалқаҷар.

Як майдони калон ҳаст,

Ҳамвор чун кафи даст.

Бофта барояш баҳор,

Қолӣ аз нақшу нигор.

Тирукамон барояд,

Хушрўй менамояд.

Мухлиси футбол бошӣ,

Дар ҳаваси гол бошӣ,

Аз дари тирукамон,

Бо пайраҳаи калон,

Биё, биё, марҳамат,

Ба пеши мо, марҳамат!

СЕБИСТОН

Аз кўҳи Шар-шар

Намоӣ гузар,

Ба деҳаи мо

Марҳамат намо.

Деҳи Себистон,

Деҳаи калон.

Мардуми мо шод,

Аз паи эҷод.

Мо дар шитобем,

Туннел мекобем.

Аз дарёи Вахш,

Дарёи ҷонбахш,

Об биёрем,

Пахта мекорем.

Дашти Данғара

Фардо яксара

Обшор шавад,

Пахтазор шавад.

ШАҲРИ ДУШАНБЕ

Шаҳри Душанбе –

Шаҳри ҷавонӣ.

Cарсабзу хуррам,

Чун зиндагонӣ.

Гулгаштҳоят

Бисёр дилкаш,

Чун боғу бўстон

Сабзу мунаққаш.

Нав-нав биноҳо

Гардида барпо,

Сар сўи афлок

Бар дидаи мо.

Дар рўи дарё

Дорӣ ту шаҳпул,

Дар ҳар сари пул

Як хирмани гул.

Бахшад ҳаловат

Гулбоғу гулшан,

Салқин ҳамеша

Аз оби фантан.

Кунҷу канорат

Гардида зебо,

Аз тори теппа

Кардам тамошо.

Нашъунамо кун,

Эй шаҳри хубон,

Ту ифтихорӣ

Бар Тоҷикистон.